అనంతపురం, ఫిబ్రవరి 21(జానం న్యూస్): అనంతపురం, వినయ్ కుమార్ హై స్కూల్లో ట్యూషన్ ఫీజులు చెల్లించలేక ఇబ్బందులు ఎదుర్కొంటున్న 23 మంది పేద విద్యార్థులను పాఠశాల యాజమాన్యం గుర్తించింది. విద్యార్థుల చదువుకు ఆర్థిక సమస్యలు అడ్డంకి కావొద్దనే ఉద్దేశంతో ఈ విషయాన్ని పాఠశాల పూర్వ విద్యార్థుల సంఘానికి తెలియజేయగా, వారు వెంటనే స్పందించి తమ సామాజిక బాధ్యతను చాటుకున్నారు.
విద్యకు విఘాతం కలగకుండా చూడాలనే సంకల్పంతో పూర్వ విద్యార్థుల సంఘం తరఫున తక్షణ సహాయంగా ₹20,000లను పాఠశాల మేనేజ్మెంట్కు అందజేశారు. ఈ సహాయం ద్వారా ఫీజులు చెల్లించలేక ఆందోళనలో ఉన్న విద్యార్థులకు ఊరట లభించింది.
ఈ సందర్భంగా పూర్వ విద్యార్థుల సంఘం అధ్యక్షుడు గంధం ప్రకాష్ బాబు మాట్లాడుతూ, “ఆర్థిక ఇబ్బందుల కారణంగా ఏ ఒక్క విద్యార్థి చదువు ఆగకూడదు. పేద విద్యార్థుల భవిష్యత్తు మా బాధ్యతగా భావిస్తున్నాం. అవసరమైనప్పుడు అందరం కలిసి ముందుకు వచ్చి సహకరిస్తాం” అని తెలిపారు. విరాళాలను ఫోన్పే ద్వారా స్వీకరిస్తున్నామని, ఇప్పటికే పలువురు పూర్వ విద్యార్థులు ఉదారంగా స్పందిస్తున్నారని పేర్కొన్నారు.
ఇందులో ముఖ్యంగా నంద్యాల ప్రభుత్వ పాలిటెక్నిక్ లో సీనియర్ లెక్చరర్గా సేవలందిస్తున్న ఎం.జీవరాజ్ పాల్ వరప్రకాష్ గారి స్పందన విశేషంగా నిలిచింది. విద్యాపట్ల ఆయనకు ఉన్న నిబద్ధత, సమాజం పట్ల బాధ్యతాభావం మరోసారి చాటుకుంది. విద్యార్థుల పరిస్థితి తెలుసుకున్న వెంటనే ఆలస్యం చేయకుండా ₹20,000లను ఫోన్పే ద్వారా పంపించి, ఆ మొత్తాన్ని తక్షణం పాఠశాల యాజమాన్యానికి అందేలా చేశారు.
జీవరాజ్ పాల్ వరప్రకాష్ విద్యారంగంలో అనుభవజ్ఞుడైన అధ్యాపకులు మాత్రమే కాకుండా, సామాజిక స్పృహ కలిగిన వ్యక్తిగా కూడా పేరుపొందారు. విద్యార్థుల భవిష్యత్తు బలపడాలంటే సమాజం మొత్తం బాధ్యత తీసుకోవాలనే భావనతో ఆయన తరచూ విద్యా, సామాజిక కార్యక్రమాలకు సహకారం అందిస్తూ ఉంటారు. ఆర్థికంగా వెనుకబడిన విద్యార్థులు ఉన్నత విద్యను అందుకోవాలని ఆయన ఎప్పుడూ ఆకాంక్షిస్తుంటారు.
ఈ సందర్భంగా పూర్వ విద్యార్థుల సంఘం సభ్యులు జీవరాజ్ పాల్ వరప్రకాష్ కి ప్రత్యేక కృతజ్ఞతలు తెలిపారు. “విద్యార్థుల కోసం ముందడుగు వేసిన ఆయన సేవలు అందరికీ ఆదర్శం” అని కొనియాడారు.
ఇకపై కూడా వినయ్ కుమార్ హై స్కూల్ అభివృద్ధి కార్యక్రమాల్లో పూర్వ విద్యార్థుల సంఘం సక్రియంగా పాల్గొంటుందని, పాఠశాల అభ్యున్నతికి తమవంతు సహకారం నిరంతరం అందిస్తామని సంఘం ప్రతినిధులు హామీ ఇచ్చారు.
ఈ సందర్భంగా లో సీనియర్ లెక్చరర్గా సేవలందిస్తున్న ఎం. జీవరాజ్ పాల్ వరప్రకాష్ చరవాణి ద్వారా జానం న్యూస్ ప్రతినిధితో మాట్లాడుతూ, “పేద విద్యార్థుల చదువు ఆర్థిక సమస్యల వల్ల మధ్యలో ఆగిపోవడం చాలా బాధాకరం. విద్య అనేది ప్రతి ఒక్కరి హక్కు. అలాంటి పరిస్థితుల్లో మనం ముందుకు వచ్చి చేయూతనివ్వడం మన సామాజిక బాధ్యతగా భావిస్తున్నాను. చిన్న సహాయం అయినా ఒక విద్యార్థి భవిష్యత్తును మార్చగలదు” అని అన్నారు.
అలాగే, “విద్యార్థులు ధైర్యంగా చదువుపై దృష్టి పెట్టాలి. ఫీజులు, ఇతర ఆర్థిక సమస్యల గురించి ఆందోళన చెందకుండా తమ లక్ష్యాలను చేరుకోవడానికి కృషి చేయాలి. సమాజంలో ఇంకా ఎంతో మంది సత్సంకల్పంతో సహాయం చేసేందుకు సిద్ధంగా ఉన్నారు” అని ఆయన సూచించారు.
ఇకపై కూడా తో పాటు ఇతర విద్యాసంస్థలలో చదువుతున్న పేద, ప్రతిభావంతులైన విద్యార్థులకు అవసరమైన సహాయం అందించేందుకు సిద్ధంగా ఉన్నానని జీవరాజ్ పాల్ వరప్రకాష్ స్పష్టం చేశారు.
ఈ కార్యక్రమంలో పూర్వ విద్యార్థుల సంఘం అధ్యక్షుడు గంధం ప్రకాష్ బాబు, కార్యదర్శి జాన్ ప్రభాకర్, జాఫర్ వలి, సభ్యులు జూటూరి మమత, హరీష్, మహేష్ రెడ్డి తదితరులు పాల్గొన్నారు.
Save or share this story as a newspaper-style Epaper Clip:
