మదనపల్లిలో ఘనంగా ప్రపంచ ఆదివాసీ దినోత్సవ వేడుకలు
హక్కులు, విద్య, సంక్షేమం, అభివృద్ధి కోసం ఐక్యంగా కృషి చేయాలి
మదనపల్లి, ఆగస్టు 9 (జానం న్యూస్):
ఆంధ్రప్రదేశ్ గిరిజన యానాది సేవా సంఘం ఆధ్వర్యంలో మదనపల్లి పట్టణంలో ప్రపంచ ఆదివాసీ దినోత్సవ వేడుకలను ఘనంగా నిర్వహించారు. సంఘం రాష్ట్ర వర్కింగ్ ప్రెసిడెంట్ గడ్డం శ్రీనివాసులు ఆధ్వర్యంలో జరిగిన ఈ కార్యక్రమానికి అన్నమయ్య, చిత్తూరు, శ్రీ సత్యసాయి జిల్లాల నుంచి పెద్ద సంఖ్యలో గిరిజన యానాదులు హాజరయ్యారు.
ప్రపంచ ఆదివాసీ దినోత్సవాన్ని పురస్కరించుకుని స్థానిక జిల్లా పరిషత్ ఉన్నత పాఠశాల నుంచి గిరిజన యానాదులు భారీ ర్యాలీ నిర్వహించారు. గిరిజనుల హక్కులు, సంక్షేమం, అభివృద్ధికి సంబంధించిన నినాదాలు చేస్తూ పట్టణంలోని ప్రధాన వీధుల గుండా ర్యాలీ కొనసాగింది. అనంతరం డాక్టర్ బి.ఆర్. అంబేద్కర్ విగ్రహం వద్దకు చేరుకుని ఆయన విగ్రహానికి పూలమాలలు వేసి ఘనంగా నివాళులర్పించారు.
అంబేద్కర్ ఆశయాలను స్ఫూర్తిగా తీసుకుని గిరిజనుల హక్కుల సాధనకు ఐక్యంగా కృషి చేయాలని ఈ సందర్భంగా నాయకులు పిలుపునిచ్చారు. అనంతరం ర్యాలీ తిరిగి జిల్లా పరిషత్ ఉన్నత పాఠశాలకు చేరుకోగా, అక్కడి సమావేశ భవనంలో ప్రపంచ ఆదివాసీ దినోత్సవ సభ నిర్వహించారు. ఈ సమావేశానికి సంఘం రాష్ట్ర వర్కింగ్ ప్రెసిడెంట్ గడ్డం శ్రీనివాసులు అధ్యక్షత వహించారు
.
కార్యక్రమానికి ముఖ్య అతిథులుగా ఆంధ్రప్రదేశ్ గిరిజన యానాది సేవా సంఘం రాష్ట్ర అధ్యక్షులు పులి శ్రీనివాసులు, సంఘం గౌరవ అధ్యక్షులు జానం గంగిరెడ్డి హాజరయ్యారు. ఈ సందర్భంగా వారు మాట్లాడుతూ గిరిజనుల సామాజిక, ఆర్థిక, విద్యా, ఉపాధి రంగాల్లో సమగ్ర అభివృద్ధి సాధించేందుకు ప్రభుత్వాలు మరింత దృష్టి సారించాల్సిన అవసరం ఉందన్నారు. గిరిజనుల సంక్షేమానికి అందుబాటులో ఉన్న ప్రభుత్వ పథకాలు, హక్కులు ప్రతి కుటుంబానికి చేరేలా చర్యలు తీసుకోవాలని కోరారు.
ప్రపంచ ఆదివాసీ దినోత్సవం కేవలం వేడుకలకు మాత్రమే పరిమితం కాకుండా ఆదివాసీల హక్కులు, సంస్కృతి, సంప్రదాయాలు, జీవన విధానం, సహజ వనరులపై వారి హక్కుల పరిరక్షణను గుర్తుచేసే ముఖ్యమైన రోజని వారు పేర్కొన్నారు. గిరిజన సమాజం ఎదుర్కొంటున్న సమస్యలను ప్రభుత్వాల దృష్టికి తీసుకెళ్లి, వాటి పరిష్కారం కోసం సంఘటితంగా పోరాడాల్సిన అవసరం ఉందన్నారు.
సంఘం రాష్ట్ర వర్కింగ్ ప్రెసిడెంట్ గడ్డం శ్రీనివాసులు మాట్లాడుతూ యానాది గిరిజనుల అభివృద్ధికి విద్య అత్యంత కీలకమని అన్నారు. ప్రతి గిరిజన కుటుంబం తమ పిల్లలను చదివించి ఉన్నత విద్య వైపు ప్రోత్సహించాలని సూచించారు. గిరిజనులకు అందాల్సిన సంక్షేమ పథకాలు, విద్యా, ఉపాధి అవకాశాలు పూర్తిస్థాయిలో అందేలా సంఘం నిరంతరం కృషి చేస్తుందని తెలిపారు.
యానాది సమాజం ఎదుర్కొంటున్న సమస్యలను గుర్తించి వాటి పరిష్కారం కోసం ప్రభుత్వ యంత్రాంగంతో సమన్వయం చేసుకుంటూ ముందుకు సాగుతామని ఆయన చెప్పారు. గిరిజనుల అభివృద్ధితో పాటు వారి సంప్రదాయాలు, సంస్కృతి, ఆచార వ్యవహారాలను పరిరక్షించుకోవాల్సిన బాధ్యత ప్రతి ఒక్కరిపై ఉందన్నారు. గిరిజన సమాజంలో ఐక్యతను పెంపొందించుకుని హక్కుల సాధన కోసం కలిసికట్టుగా పనిచేయాలని పిలుపునిచ్చారు.
ఈ కార్యక్రమంలో అన్నమయ్య, చిత్తూరు, శ్రీ సత్యసాయి జిల్లాలకు చెందిన గిరిజన యానాదులు పెద్ద సంఖ్యలో పాల్గొన్నారు. దీంతో మదనపల్లి పట్టణంలో ప్రపంచ ఆదివాసీ దినోత్సవ వేడుకలు ఉత్సాహభరిత వాతావరణంలో జరిగాయి.
కార్యక్రమంలో సంఘ జిల్లా మహిళా నాయకురాలు నారాయణమ్మ, సంఘ నాయకులు టేకుమంద రెడ్డప్ప, చుక్కలపాటి ఆదినారాయణ, తిరుమలశెట్టి రమణ, సహదేవ, కె. శివరాం, కుప్పం రాజేష్, కోటకొండ మధు, కుప్పం కోటప్ప, జి. వెంకటేశ్వర, భూరగమంద శ్రీనివాసులు, పెద్దిరాజు తదితరులు పాల్గొన్నారు.
Save or share this story as a newspaper-style Epaper Clip:
